Entertainment

Pagpamugos sa pagpamakuna | Banat

Pagpamugos sa pagpamakuna | Banat

Samtang gituki sa mga sakop sa Kongreso ang balaudnon nga mohimo nang pinugsanay sa pagpamakuna batok sa COVID-19, makatabang tingali nila ang susamang mga lagda nga naumol na sa ubang kanasuran. Kay samtang niinsistir ang mga negosyante nga ang pinugsanay nga pamakuna maoy gikinahanglan aron mas paspas nga makabangon pagbalik ang nasudnong ekonomiya, may mga grupo sab nga nanalipod sa katungod sa di pagpabakuna.

Ahat ang lalis niadtong nihit pang suplay sa bakuna sa Pilipinas. Pero karon nga may sobra nang mga bakuna dungan sa paghinay sa pagpamakuna tungod sa pagpili na sa katawhan sa brands sa mga bakuna, panahon na tingaling sublion ang karaang lagda nga boluntaryo ang pagpabakuna.

* * *

Niang lista sa pipila ka nasud nga namugos na sa ilang katawhan sa pagpabakuna batok sa COVID-19:

- Indonesia nimulta na og 5 milyones rupiah (P18,000) sugod niadtong Pebrero sa mga nagdumili sa pagpabakuna;

- Micronesia nipugos sa tanang 18 anyos pataas sa pagpabakuna sugod niadtong Hulyo;

- Turkmenistan nipugos sa pagpamakuna ang tanang 18 anyos pataas; ug

- Sri Lanka nisugo sugod niadtong Agosto nga ang mga may bakuna ray makabiyahe sa nagkalainlaing probinsiya.

* * *

Mas daghan ang mga nasud nga namugos sa pagpamakuna sa healthcare workers, ubang mga kawani sa gobiyerno ug mga kustomer sa mga kan-anan, imnanan ug mga tapokanan:

Australia (sugod niadtong Hunyo), Britanya (sugod karong Oktubre), Canada, Fiji (sugod karong Nobyembre), Pransiya (sugod niadtong Agosto), Greece (sugod karong Septiyembre), Italya (sugod niadtong Marso), Hungary, Poland (sugod niadtong Agosto), Russia (sugod niadtong Hunyo), Saudi Arabia, Kazakhstan, Lebanon ug Malta.

* * *

Si US President Joe Biden nisugo sa pagbakuna sa 100 milyones ka healthcare workers, federal contractors ug mga trabahante sa pribadong mga kompaniya. Mga ospital sa New York manaktak na karong semanaha sa kaliboan ka healthcare workers nga wa magpabakuna. Nagplano hinuon ang Republicans sa pagkuwestiyon sa legalidad sa mga lagda atubangan sa korte.

Kontrobersiya ni sa kahimsog sa publiko nga segurong mosangko sa mga huwes—di sa mga doktor—nga mapugos sa pagtimbang-timbang unsa ang ipatigbabaw: Ang kahimsog ba sa kinatibuk-an sa katawhan o ang sukwahi nga pagtuo sa pipila nga niisip sa mga bakuna nga mas seryuso nga hulga sa ilang panglawas.

* * *

[email protected]