World

EDITORYAL - Insulto ba? | Banat

EDITORYAL - Insulto ba? | Banat

Pipila ka mga netizens ang mialma kabahin sa pagpadala ni Pres. Duterte kang DENR Secretary Roy Cimatu aron pangunayan ang pagtutok sa COVID-19 response sa Cebu City nga karon misulbong ang gidaghanon sa mga nagpositibo sa maong virus.

Ang pag-alma masabtan nga dili tungod kay di sila gusto ni Cimatu, kondili tungod kay daw nainsulto tungod sa pulong ni Duterte nga “pagkagahi’g ulo” sa mga Cebuano mao nga nidaghan ang mga kaso dinhi.

Di na kini angay ikatingala gikan sa baba sa pangulo nga way preno kun mobuka.  Hinuon,  kaning mga mialma nagsunod gyud tingali ni sila sa mga protocols ug tungod aning pagpabadlong sa uban napagan hasta silang mga nagtinarong. 

Insulto o nasakitan ang mga Sugboanong nagtinarong apan makita man sa mga numero nga midaghan gyud ang nataptan kay wa mosunod sa protocols ang uban. Pagkatinuod, dili tanang mga tawong naa sa gawas sa panimalay panahon sa quarantine pagkaon maoy gipangita o tuyo, ang uban nag-estambay, inom-inom, sugal, tsismis lang ug walay importanteng tumong. Kining pagpatuman sa health protocols sama sa pagsuot og facemask, social distancing ug stay home policy numero unong tahas sa mga barangay kay sila maoy lokal nga mga otoridad.

Angay pa gani ipasalamat ang pag-anhi sa grupo ni Cimatu nga gilangkoban ni DILG Secretary Eduardo Año, DOH Secretary Francisco Duque III ug uban pa tungod kay matutokan kining problema sa Cebu City.

Way “specific strategy” nga matawag nga epektibo pagsulbad ani kay kini pandemiya nga giatubang sab sa ubang mga nasud.

Apan kaning basic health protocols maoy labing duol nga panagang aron mapugngan ang pagkatap sa virus. Sama sa samad, kinahanglang pangitaon kun asang partiha sa lawas ang nasamad, pugngan ang pag-awas sa dugo ug tambalan kini.  Mao kini ang tumong sa pag-anhi sa grupo ni Cimatu.

Kun maghigpit man unya sa mga lockdowns, di angay mabalaka ang daan ng nagsunod sa protokol kay di na kini bag-o.  Ang angay mabalaka kadtong dili tigsunod sa protokol.