Entertainment

Lakers mipulbos sa Rockets abante sa Western Conference finals | Banat

Lakers mipulbos sa Rockets abante sa Western Conference finals | Banat

CEBU, Philippines — Yano kaayong gipulbos sa Los Angeles Lakers ang Houston Rockets, 119-96 sa Game-5 sa "best-of-seven" NBA Western Conference semifinal series kagahapon didto sa Orlando, Florida.

Si LeBron James mikabkab og 29 puntos uban ang 11 ka rebounds sa dihang ang Lakers miabante sa  Western Conference finals sa labing unang higayon sud sa usa ka dekada.

Midugang si Anthony Davis og 13 puntos ug 11 ka rebounds, samtang sila si Kyle Kuzma ug  Markieff Morris nagkumbinar og 33 puntos alang sa Lakers nga miharos sa Rockets sa baraha nga 4-1.

Katapusang nakataak sa Western Conference Finals ang Lakers niadtong 2010 sa dihang gipangulohan pa sila ni anhing Kobe Bryant. Niadtong panahona, ilang gipukan ang Phoenix Suns alang sa conference title ug dayon gipaksit ang Boston Celtics  sa katapusan nilang NBA Finals.

Sa tinguha nga matambalan ang 10 ka tuig nilang huwaw sa korona, harungon sunod sa Lakers ang modaog sa serye tali sa Los Angeles Clippers ug Denver Nuggets. Ang Clippers kasamtangang naglabaw sa sa series, 3-2.

Mangtas kaayo ang Lakers gikan sa pagsugod hinungdan nga ila dayong gilubong ang Rockets og 15 puntos human sa unang kuwarter sa iskor nga 35-20.

Namugnaw kadiyot ang Lakers sa ikaduhang kuwarter hinungdan nga nakasikit ang Rockets ngadto na lang sa siyete puntos sa iskor nga 38-31, apan si James ug ang iyang mga katropa milusad og 33-18 run  sa ikatulong kuwarter aron pagkontrolar sa nahibiling mga oras sa duwa.

Sa kinatibuk-an, ang Lakers miposa og 19 ka tres nga usa sa mga hinungdan sa maayong pagkaugbok sa Rockets.

Si James Harden mikadlit og 30 puntos alang sa Rockets, apan wala kini makakuha og maayong suporta gikan sa sidekick niyang si Russell Westbrook nga naangklahan ngadto lamang sa 10 puntos.